ქუცნაშვილი პარლამენტში ვაზაგაშვილების საქმეების განხილვას მოითხოვს

2015-01-27 15:04:12, 258 ნახვა

საპარლამენტო უმრავლესობის წევრი ზაქარია ქუცნაშვილი მიიჩნევს, რომ პარლამენტში იური და ზურაბ ვაზაგაშვილების საქმეებთან დაკავშირებით დახურულ რეჟიმში საკომიტეტო მოსმენა აუცილებელია.
მისივე თქმით, იურიდიული კომიტეტის ყველა წევრი თანახმა იყო, რომ პარლამენტში, დახურულ სხდომაზე პროკურატურისა და შსს–ს წარმომადგენლებისთვის მოესმინათ.
„პარლამენტში მოწვეულები უნდა იყვნენ სამართალდამცავი ორგანოების წარმომადგენლები და იურიდიული კომიტეტის დახურული სხდომა ჩატარდეს. ჩვენ გვაქვს სამართლებრივი ხასიათის შეკითხვები, რა ობიექტური მიზეზები განაპირობებდა გამოძიების ასე გაუმართლებელ ვადებში გაჭიანურებას“, – აღნიშნა ქუცნაშვილმა.
ცნობისთვის, იურიდიულ საკითხთა კომიტეტის თავჯდომარის ვახტანგ ხმალაძის ინფორმაციით, პარლამენტში ვაზაგაშვილების საქმეებთან დაკავშირებით დახურულ რეჟიმში საკომიტეტო მოსმენა აღარ გაიმართება.
ხმალაძე მიიჩნევს, რომ აღნიშნული საქმეების განხილვა კომიტეტის დახურულ სხდომაზე გამოძიების ინტერესებიდან გამომდინარე მიზანშეუწონელია.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან