ირაკლი ფირცხალავა ომბუდსმენს კრიმინალური სამყაროს დამცველს უწოდებს

2015-01-27 17:37:11, 386 ნახვა

საზოგადოება

კრიმინალური პოლიციის ხელმძღვანელის ყოფილი მოადგილე ირაკლი ფირცხალავა სახალხო დამცველის უჩა ნანუაშვილის დღევანდელ განცხადებას გამოეხმაურა.
ფირცხალავას მტკიცებით, მას არასოდეს არავის ლიკვიდაცია არ დაუგეგმავს. აღნიშნული თემის გააქტიურება კი, იური ვაზაგაშვილის მკვლელობას დაუკავშირა.
აქვე, ირაკლი ფირცხალავამ უჩა ნანუაშვილს კრიმინალური სამყაროს დამცველი უწოდა.
„ეს არის დიდი სპექტაკლი, რომელიც უკვე დადგა შავმა სამყარომ და სცენარიც დაწერილი აქვს. უკვე მეორე აქტი მიმდინარეობს. ამას საზოგადოება თვითონ გადაწყვიტავს, უნდა იყოს ამ ქვეყანაში კრიმინალი ზეობაში თუ უნდა იყოს კანონი და შესაბამისად ის პოლიციელები, ვინც ამ კანონს იცავენ. სახალხო დამცველმა კი გადაწყვიტა, რომ გაეკეთებინა ეს განცხადება და მე მას დღეიდან კრიმინალური სამყაროს დამცველს ვუწოდებ“, – განაცხადა ფირცხალავამ .
ცნობისთვის, დღეს ომბუდსმენმა ბრიფინგი გამართა, სადაც ზურაბ ვაზაგაშვილის საქმეში მსჯავრდებულის ახსნა–განმარტება გაასაჯაროვა.
ნანუაშვილის თქმით, აღნიშნული მსჯავრდებული ირაკლი ფირცხალავას მასზე ზეწოლაში ადანაშაულებს. როგორც ბრალდებული ამბობს, ფირცხალავამ მან ბუტა რობაქიძის დედის ია მეტრეველის მკვლელობა დაავალა, წინააღმდეგ შემთხვევაში ნარკოტიკული დანაშაულისთვის პასუხისგებაში მისცემდა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან