თიბისი ბანკმა 2014 წლის შედეგები შეაჯამა

2015-01-30 15:04:47, 533 ნახვა

ეკონომიკა

„თიბისი ბანკის“ გენერალურმა დირექტორმა ვახტანგ ბუცხრიკიძემ 2014 წლის შედეგები შეაჯამა.
მან 2014 წლის განმავლობაში თიბისი ბანკის ძირითადი მიღწევები დაასახელა.
ბუცხრიკიძის განცხადებით, თიბისი ბანკი საცალო ბაზარზე ფიზიკური პირების დეპოზიტებისა და სესხების მიხედვით (33,7% -იანი წილი დეპოზიტების ბაზარზე, ხოლო 29,7%-იანი წილი სესხების ბაზარზე) N1 ბანკი გახდა. ქართულ კომპანიებს შორის ლონდონის საფონდო ბირჟაზე ყველაზე მსხვილი განთავსება განახორციელა.
„ასევე თიბისი ბანკმა წარმატებით დაასრულა ბანკი კონსტანტას შერწყმა და მიკროფინანსირების პორტფელი 40 მლნ–მდე ლარით გაზარდა“, – აღნიშნა ბუცხრიკიძემ.
მისივე შეფასებით, ძირითადი ფინანსური მაჩვენებლები 2014 წლის განმავლობაში დინამიურად გაიზარდა და მაქსიმალურ შედეგს მიაღწია.
„ კერძოდ, 2014 წლის დეკემბრის მდგომარეობით, მთლიანი აქტივები გაიზარდა 5 მილიარდ 423 მილიონ ლარამდე, კლიენტებზე გაცემული სესხების ოდენობა3 მილიარდ 706 მილიონ ლარამდე, კლიენტების ანგარიშებმა მიაღწია 3 მილიარდ 322 მილიონ ლარს, ხოლო სააქციო კაპიტალმა 1 მილიარდ 19 მილიონ ლარს. საცალო სესხები 2014 წლის მანძილზე 38.0%-ით გაიზარდა, ხოლო საცალო დეპოზიტები 22,8%-ით. კორპორატიულ სესხებში წლიურმა ზრდამ 6,4% შეადგინა, ხოლო დეპოზიტებში 1,6%. 36%-იანი ზრდა იყო მცირე და საშუალო ბიზნესის სესხებში, ხოლო დეპოზიტებში 12,4%“, – განაცხადა ბუცხრიკიძემ.
რაც შეეხება მიკრო სეგმენტს, ბუცხრიკიძის თქმით, ბანკი კონსტანტას შერწყმის შემდეგ მიკროფინანსირება თიბისი ბანკის ერთ-ერთი პრიორიტეტულ მიმართულებად ჩამოყალიბდა.
„შედეგად, თიბისი ბანკმა მიიღო გადაწყვეტილება, შეესყიდა პროკრედიტ ბანკის 40 მილიონ ლარამდე მოცულობის სასესხო პორტფელი, რაც მისცემს მას საშუალებას განვითარდეს რეგიონებში და გაზარდოს ბაზრის წილი მიკრო სეგმენტში“, – აღნიშნა ვახტანგ ბუცხრიკიძემ.
მისივე ინფორმაციით, 2014 წელს თიბისი ბანკმა განახორციელა ქართული კომპანიის ყველაზე მსხვილი IPO (აქციების განთავსება) ლონდონის საფონდო ბირჟაზე. IPO-ს შედეგად თიბისი ბანკმა მოიზიდა 259 მლნ დოლარი და კომპანიის ღირებულება გაზარდა 640 მლნ დოლარამდე.
ბუცხრიკიძის თქმით, 2014 წელს მოხდა ცვლილება თიბისი ბანკის მენეჯმენტში. სხვადასხვა მიმართულებების სამართავად თიბისი ბანკმა მსოფლიოს წამყვანი ბანკების (Barclays, Deutsche Bank, Unicredit Group ) ტოპ მენეჯერები მოიწვია: გიორგი თხელიძე - რისკების მართვის დირექტორად, ნიკოლოზ ქურდიანი - მიკრობიზნესის მართვის დირექტორად, დავით წიკლაური - კორპორატიული საბანკო ბიზნესის მართვის დირექტორად.
ბუცხრიკიძის განცხადებით, 2014 წელს თიბისი ბანკმა არაერთი აღიარება მოიპოვა ისეთი პრესტიჟული უცხოური გამოცემებისგან, როგორიცაა : Global Finance, Euromoney, EMEA Finance და The Banker and PWM.
„თიბისი ბანკის სახით, ქართულმა ბანკმა პირველად მიიღო ჯილდო ორ კატეგორიაში: საუკეთესო პერსონალური საბანკო მომსახურება (The Banker and PWM) და საუკეთესო სოციალური პასუხისმგებლობის მქონე ბანკი (EMEA Finance Europe Banking Awards)“, – აღნინა ვახტანგ ბუცხრიკიძემ.
მისივე თქმით, 2014 წელს თიბისი ბანკი აქტიური იყო სოციალური პასუხისმგებლობის მიმართულებით.
„ბანკმა განახორციელა რამდენიმე მსხვილი პროექტი, ტრადიციულად, კულტურისა და ხელოვნების მხარდასაჭერად. კერძოდ, ლიტერატურული პრემია „საბას“ დაჯილდოებისთვის შექმნა ექსკლუზიური პროექტი „ეპოქის ხმები“, რომელიც „ოქროს ფონდის“ ჩანაწერებზე აიგო და რომლისთვისაც ქართველმა ხელოვანებმა შექმნეს მუსიკალური ნაწარმოებები, ქორეოგრაფიული ნომრები და ორიგინალური მხატვრობა. დაჯილდოების ცერემონია იყო ერთ-ერთი გრანდიოზული „ საბას“ ისტორიაში. 2014 წელს თიბისი ბანკმა გააგრძელა მის მიერ ინიცირებული კულტურული და საზოგადოებრივი მნიშვნელობის პროექტების დაფინანსება, მათ შორის ელექტრონული წიგნების სახლი „საბა“, არხი კულტურაზე „არტარეა“, ასევე დააფინანსა ქართველი ხელოვანების საზღვარგარეთ პოპულარიზაციის არაერთი ინიციატივა და შექმნა თანამედროვე ხელოვანთათვის თავისუფალი არტ სივრცე, პირველი „არტ კედელი“ ქალაქში. ამავე წელს პირველად საქართველოში, თიბისი ბანკის სახით, კერძო ბიზნესი ჩაერთო კინოს დაფინანსებაში და კინოცენტრთან ერთად განხორციელდა ერთობლივი პროექტი“, – განაცხადა ვახტანგ ბუცხრიკიძემ.