09:32 - 29 Mar, 2024
რეკლამა/ხელმოწერა
2016-05-04 15:46:10, 474 ნახვა

პოლიტიკა
საარჩევნო სიების სრულყოფისათვის მუშაობა გრძელდება

საარჩევნო სიების სრულყოფისათვის მუშაობა გრძელდება.

იუსტიციის სამინისტრო საარჩევნო სიის სრულყოფის პროექტს აგრძელებს. მონაცემების დაზუსტების მიზნით, სერვისების განვითარების სააგენტოს წარმომადგენლები თავად მიდიან იმ მოქალაქეებთან, რომელთა მონაცემებიც სააგენტოს ბაზებში გარკვეულ ხარვეზებს შეიცავს და რომლებიც რაიონული ცენტრებიდან მოშორებით ცხოვრობენ. ისინი უღებენ მოქალაქეებს ბიომეტრულ ფოტოს, ატარებენ შესაბამის პროცედურებს და პირადობის დამადასტურებელ დოკუმენტს უსასყიდლოდ გასცემენ.

ამჯერად, სერვისების განვითარების სააგენტოს წარმომადგენლები მესტიის რაიონის მცხოვრებ ცირა ივეჩიანს ესტუმრნენ, რომლის ფოტოსურათი სააგენტოს ბაზაში არ ინახებოდა. ყველა საჭირო პროცედურის ადგილზე გავლის შემდეგ, ცირა ივეჩიანმა საქართველოს მოქალაქის პირადობის მოწმობა უსასყიდლოდ მიიღო.

საარჩევნო სიების სრულყოფის პროექტის კიდევ ერთი კომპონენტი სიიდან გარდაცვლილ მოქალაქეთა მონაცემების ამოღებაა. ბაზაში იშვიათად, მაგრამ მაინც გვხვდება გარდაცვლილი პირების ჩანაწერები. ამ ხარვეზის აღმოსაფხვრელად სერვისების განვითარების სააგენტოს წარმომადგენლები სვანეთში კვანჭიანების ოჯახს ეწვივნენ და მოქალაქე მარო კვანჭიანის გარდაცვალების ოქმი ადგილზევე შეადგინეს.

სერვისების განვითარების სააგენტოს ინფორმაციით, საარჩევნო სიების სრულყოფის პროექტის ფარგლებში 2500-ზე მეტი შემთხვევა გამოვლინდა, როდესაც სერვისების განვითარების სააგენტოს ბაზაში მოქალაქის მონაცემებს ან საერთოდ არ ახლავს ფოტო, ან ის უხარისხოა. ამ ხარვეზის აღმოსაფხვრელად, იუსტიციის მინისტრის თეა წულუკიანის ინიციატივით, ადამიანებისათვის, რომელთა ფოტოსურათებიც არ ინახებოდა სააგენტოს მონაცემთა ელექტრონულ ბაზაში, პირადობის მოწმობები უფასოდ გაიცა.

უფასო იყო ბიომეტრული ფოტოს გადაღებაც. მათ კი, ვინც სხვადასხვა მიზეზის გამო, ვერ ახერხებდა იუსტიციის სახლებში ან საზოგდოებრივ ცენტრებში მისვლას, მოწმობის ასაღებად, სერვისების განვითარების სააგენტოს წარმომადგენლები სახლებში ესტუმრნენ. პროექტის ფარგლებში 1000-ზე მეტი მოქალაქის ფოტო დადგინდა, ხოლო 749 მოქალაქემ პირადობის დამადასტურებელი დოკუმენტი უფასოდ მიიღო.

რაც შეეხება მონაცემთა ბაზებიდან გარდაცვლილთა ამოღებას, სააგენტოს 529 მისამართზე მცხოვრები პირები გადაამოწმეს და 210 გარდაცვალების ოქმი შეადგინეს. 131 მისამართზე ამომრჩევლის ბინადრობა დადასტურდა, 137 მისამართზე მცხოვრები მოქალაქეების შესახებ კი ინფორმაციის მოპოვება ვერ მოხერხდა, ისინი წლების მანძილზე არ ცხოვრობენ აღნიშნულ მისამართზე და საზღვარგარეთ ან საქართველოს ოკუპირებულ ტერიტორიებზე იმყოფებიან.

„საარჩევნო სიების სრულყოფის” პროექტი მიმდინარე წლის ოქტომბრამდე გაგრძელდება. პროექტის მიზანი საპარლამენტო არჩევნებისათვის ამომრჩეველთა სიების მაქსიმალური სრულყოფაა.




ავტორი: ირაკლი მანაგაძე , ექსპრესნიუსის რეპორტიორი 2009 წლიდან


სოციალური ქსელები
კობახიძე - საქართველოს რელიგიური მრავალფეროვნება ჩვენი ქვეყნის ერთ-ერთი უმთავრესი სიმდიდრეა
რუსეთის საგამოძიებო - Crocus City Hall-ზე მომხდარ ტერაქტთან უკრაინელი ნაციონალისტების კავშირის დამადასტურებელი მტკიცებულება მოვიპოვეთ
სახმელეთო ტრანსპორტის სააგენტოს ხელმძღვანელობასა და გადამზიდველთა შორის შეთანხმება შედგა
ხერსონში რუსმა სამხედროებმა ტაქსის მძღოლს ცეცხლი გაუხსნეს - დაიღუპა ერთი და დაშავდა ორი ადამიანი

ომი უკრაინაში

ვიდეო/LIVE

საქართველოს დამოუკიდებლობის დღე - პირდაპირი












არქივი 2009 წლიდან

303,563
უნიკალური
ვიზიტორი დღეს 27,104
Powered By Google Analytics