ე.წ. ადმინისტრაციულ საზღვრებზე, შესაძლოა ბლოკპოსტები აღდგეს

2016-05-24 19:39:15, 764 ნახვა

პოლიტიკა

შესაძლოა გალში ინციდენტების პრევენციისა და მათზე რეაგირების მექანიზმი აღდგეს. ფორმატის აღდგენის საკითხი დღის წესრიგში ზუგდიდის მუნიციპილატეტში, სოფელ ხურჩაში მომხდარი ტრაგედიის შემდეგ დადგა, რა დროსაც ე.წ. მესაზღვრეებმა საქართველოს მოქალაქე, გიგა ოთხოზორია მოკლეს.

ფორმატის აღდგენის შესახებ გზავნილი პირველად ამერიკიის შეერთებული შტატების ელჩმა საქართველოში იან კელიმ გააჟღერა. მას შექმნილი სიტუაციიდან გამომდინარე ეს აუცილებლობად მიაჩნია. იმავე პოზიციაზეა ბრიტანეთის ელჩი ალექსანდრა ჰოლ-ჰოლიც.

როგორც „ექსპრესნიუსს“ მმართველ გუნდში განუცხადეს, პოზიცია მათთვისაც მისაღებია. პარლამენტის საგარეო ურთიერთობათა კომიტეტის თავმჯდომარე თედო ჯაფარიძე ამბობს, რომ ფორმატის აღდგენა აუცილებელია. დეპუტატის ცნობით, ამაზე მსჯელობა დიდი ხანია მიმდინარეობს. ჯაფარიძე შესაბამის სტრუქტურებს რეკომენდაციით მიმართავს, რომ ე.წ. ადმინისტრაციულ საზღვრებზე ბლოკპოსტებიც აღდგეს.

ფორმატის აღდგენა მნიშვნელოვნად მიაჩნია პოლიტოლოგ კორნელი კაკაჩიასაც. მისი აზრით, ეს ვითარებას განმუხტავს. საზღვრებთან ბლოკპოსტების გაუქმება დიდ შეცდომად მიაჩნიათ, „ნაციონალურ მოძრაობაში“. პარტიის წევრმა დავით დარჩიაშვილმა „ექსპრესნიუსს“ უთხრა, ყველაზე მთავარი პრობლემა ისაა, რომ ხელისუფლებას ქვეყნის ეროვნული ინტერესების დაცვის ნება არ აქვს.

საქართველოში აშშ-ის ელჩი, იან კელი მიიჩნევს, რომ გალში ინციდენტების პრევენციისა და მათზე რეაგირების მექანიზმი დაუყოვნებლივ უნდა აღდგეს. ეს განცხადება კელიმ დე-ფაქტო საზღვარზე საქართველოს მოქალაქის მკვლელობის ფაქტის შეფასებისას განაცხადა.

„უნდა ჩატარდეს მომხდარის სრულყოფილი გამოძიება და პასუხისმგებელი პირების პასუხისგებაში მიცემა. ჩემი აზრით, ამან ასევე, წინ წამოწია დიალოგის აუცილებლობა ადმინისტრაციულ სასაზღვრო ხაზზე, ინციდენტების პრევენციისა და მათზე რეაგირების მექანიზმის აღდგენით, რომელიც უკვე ოთხი წელიწადია არ მოქმედებს. ვფიქრობ, ის დაუყოვნებლივ უნდა აღდგეს“, - განაცხადა აშშ-ის ელჩმა.

იგივე პოზიცია გააჟღერა ბრიტანეთის გაერთიანებული სამეფოს ელჩმა საქართველოში, ალქსანდრა ჰოლ ჰოლიმაც. მისი აზრით, სოფელ ხურჩაში მომხდარმა მკვლელობამ ფორმატის არსებობის აუცილებლობა დააყენა.

"შოკირებული და შეწუხებული ვარ ხუთშაბათს სოფელ ხურჩაში მომხდარი ფაქტით, რომელმაც გიგა ოთხოზორიას სიცოცხლე შეიწირა. უმნიშვნელოვანესია, რომ ამის ჩამდენებმა პასუხი აგონ კანონის წინაშე და სიმშვიდე აღდგეს.
ამგვარი ინციდენტები ხაზს უსვამს ისეთი დისკუსიის ფორმატის არსებობის აუცილებლობას, როგორიცაა გალის ინციდენტებისა პრევენციისა და მათზე რეაგირების მექანიზმი”, - განაცხადა ალექსანდრა ჰოლ ჰოლიმ.

თსუ-ს პროფესორი, პოლიტოლოგი კორნელი კაკაჩიაც მიიჩნევს, რომ ფორმატი უნდა აღდგეს. ის ვარაუდობს, რომ ეს ასეც მოხდება.

„ალბათ ფორმატი აღდგება. იქიდან გამომდინარე, რომ საქართველოს ხელისუფლება დიდი ხანია ცდილობს გარკვეული სახის ინიციატივები გაახმოვანოს აფხაზეთთან მიმართებაში. ბუნებრივია ამ ფორმატის არარსებობა გარკვეულწილად პრობლემატური იყო. ასეთი ტიპის ფორმატი მნიშვნელოვანია იმ კუთხითაც, რომ რამენაირად შემცირდეს დაძაბულობა. ისეთი ტრაგედია რაც მოხდა, აღარ განმეორდეს.

თავის დროზე ფორმატი იმიტომ გაუქმდა, რომ აფხაზურმა მხარემ რამდენიმე ისეთი მოთხოვნა წამოაყენა, რაც ქართული მხარისთვის მიუღებელი იყო, თუმცა ფორმატის აღდგენა ჩემი აზრით ძალიან მნიშვნელოვანია“, - აცხადებს კორნელი კაკაჩია, რომელიც აქვე დასძენს, რომ შესაძლოა საქართველოს ხელისუფლებას ე.წ. ადმინისტრაციულ საზღვრებზე ბლოკპოსტების აღდგენა მოუწიოს.

„თუ იქ სიტუაცია დაიძაბა ალბათ ამას საქართველოს ხელისუფება ვერ აცდება, მაგრამ საკმაოდ კარგი ზომებია მიღებული ახლაც. იქნება მობილური პატრულები, რომლებმაც კონტროლი უნდა გაუწიონ მთლიან პერიმეტრს. მგონია, რომ ეს არ არის ცუდი. თუმცა შესაძლებელია მესაზღვრეების პუნქტების აღდგენაც. ყველაფერი დამოკიდებულია დაძაბულობის ხარისხზე - როგორ განვითარდება იქ მოვლენები. ამ ბლოკპოსტების გაუქმების ინიციატივა კონფლიქტურ რეგიონებთან რბილი პოლიტიკის გატარებით იყო ნაკარნახევი. ალბათ ამის შეფასება მოხდება, მაშინ როდესაც „ქართული ოცნების“ პოლიტიკის შეფასება მოხდება“, - განუცხადა კორნელი კაკაჩიამ „ექსპრესნიუსს“.

„ერთიანი ნაციონალური მოძრაობის“ წევრი დავით დარჩიაშვილი აცხადებს, რომ ყველაზე მნიშვნელოვანია ხელისუფლების ნება, რომ ეროვნული ინტერესები დაიცვას.

„ამ ნების ნაკლებობაა დღევანდელი ხელისუფლების პირობებში. თუ კი ინციდენტებისა და პრევენციის მექანიზმის მუშაობას მეორე მხარე უშლის ხელს ეს საკითხი ძალიან კარდინალურად დადგებოდა საერთაშორისო დონეზე. მას დიდი რეზონანსი მოჰყვებოდა, იმასთან დაკავშირებით რომ რუსეთი არღვევს ამ პირობასაც, სხვა პირობებთან ერთად.

ეს ნება რომ იყოს ქართული სპეცსამსახურების კონტროლი არ შესუსტდებოდა, ბლოკპოსტები არ მოიხსნებოდა. ქართველი სპეცდანაყოფები იქნებოდნენ იქ და გააკონტროლებდნენ ვითარებას, რაც ხელს შეუშლიდა ასეთ კრიმინალს, რაც რამდენიმე დღის წინ მოხდა. თუკი ასეთი რამ მოხდებოდა მის ჩამდენს ეცოდინებოდა, რომ მიწიდან ამოიღებდნენ მას. საქართველოს ხელისუფლებას ამის უნარი და ნება არ აქვს და ეს არის მთავარი პრობლემა.

რა თქმა უნდა ბლოკპოსტების აღდგენის მომხრე ვარ. მიმაჩნია, რომ მისი მოხსნა უზარმაზარი შეცდომა, მარცხი და სისუსტის მაჩვენებელი იყო, შესაბამისად ცხადია მის აღდგენას მხარს ვუჭერ“, - განუცხადა „ექსპრესნიუსს“ დავით დარჩიაშვილმა.

პარლამენტის საგარეო ურთიერთობათა კომიტეტის თავმჯდომარე თედო ჯაფარიძე აცხადებს, რომ ფორმატის განახლებაზე მოლაპარაკება დიდი ხანია მიმდინარეობს. მისი შეფასებით, ეს მნიშვნელოვანია მსგავსი ფაქტების პრევენციისთვის.

„საუბარი იმით დავიწყოთ, რომ საზარელი შემთხვევა მოხდა. ეს უდიდესი ტრაგედიაა. საქართველოს მოქალაქე ჩვენს კონტროლირებად ტერიტორიაზე მოკლეს. ეს შემთხვევა არ უნდა ყოფილიყო ფორმატის აღდგენის მიზეზი. ჩემი ინფორმაციით, არც არის ვინაიდან მის განახლებაზე საუბარი უკვე დიდი ხანია მიმდინარეობს. მოგეხსენებათ ამგვარ საკითხებს ჟენევის ფორმატში განიხილავენ. ამ პროცესში საერთაშორისო თანამეგობრობის ჩართულობა ძალიან მნიშვნელოვანია. ძალიან სწორი იყო ბატონი და ქალბატონი ელჩების განცხადებები. ეს კარგია იმიტომაც, რომ მომავალში მსგავსი რამე არ მოხდეს“, - აღნიშნავს დეპუტატი.

ჯაფარიძე აქვე აცხადებს, რომ ფორმატის გაუქმების გადაწყვეტილებაში თავად ჩართული არ ყოფილა.

„ზუსტად არც ის ვიცი, როდის გაუქმდა ეს მექანიზმები. შესაძლოა, რომელიმე მაღალჩინოსანმა ჩათვალოს, რომ ამგვარი მექანიზმების არსებობა აუცილებელი არ არის, მაგრამ უნდა ვაღიაროთ, რომ ეს არასწორი გადაწყვეტილება იყო. ვსაუბრობ იმ შემთხვევაზე თუ მექანიზმები გაუქმებულია, მაგრამ მისი აქტიურად გამოყენება ჯერ კიდევ საჭიროა.

ჩვენმა სტრუქტურებმა ყველა დეტალი უნდა გაითვალისწინონ. ნებისმიერ დონეზე - ეს იქნება ჩვენი ქვეყნის შიგნით თუ საერთაშორისო არენაზე ძალიან მკაცრი პოზიციები უნდა გააჟღეროს“, - აცხადებს თედო ჯაფარიძე „ექსპრესნიუსთან“ საუბრისას.

პარლამენტის საგარეო კომიტეტის თავმჯდომარე იზიარებს პოზიციას, რომ ე.წ. ადმინისტრაციულ საზღვრებთან სასაზღვრო პუნქტების აღდგენა საჭიროა.

„მესმის თქვენი შეკითხვის არსი. რა თქმა უნდა, რომ უნდა იყოს სასაზღვრო პუნქტები იქნება, თუ საპატრულო გამშვები პუნქტები. ნებისმიერი ის ზომა უნდა იყოს გამოყენებული, რომელიც ჩვენს მოქალაქეებს დაიცავს, არა მარტო ჩვენს ტერიტორიაზე, არამედ ე.წ. ბუფერულ ზონაში. ეს ჩვენი მოვალეობაა.

რამდენადაც მე ვიცი აფხაზური მხარე იყო სასაზღვრო და საპატრულო პუნქტების გაუქმების მომხრე. მათი პოზიციის გათვალისწინებით მოხდა მისი გაუქმება. მაგრამ რაც არ უნდა გააკეთოს აფხაზური მხარე იქნება თუ რუსული, ჩვენ ჩვენი პასუხისმგებლობა გვაქვს და ვიცავთ ჩვენს მოქალაქეებს, ამიტომ ჩვენ ყველა ზომა უნდა მივიღოთ იმისათვის, რომ ჩვენი მოქალაქე დაცული იყოს. მე მოვუწოდებ ჩვენს სტრუქტურებს, რომ ეს გადაწყვეტილება მიიღონ. ისინი რა თქმა უნდა განიხილავენ ყველა დეტალს და იმ ზომას მიიღებენ, რასაც საჭიროდ ჩათვლიან“, - განაცხადა თედო ჯაფარიძემ.

იაგო ნაცვლიშვილი

ავტორი: ირაკლი მანაგაძე , ექსპრესნიუსის რეპორტიორი 2009 წლიდან