არ ვთვლი, რომ რაიმე სერიოზული ტიპის გაყალბება მოხდა, ერთის გარდა: წინასაარჩევნოდ ტვინები ისე გაირეცხა და არჩევნებში ფული ისე მონაწილეობდა, რომ შედეგებზე გავლენა მოახდინა. ორმა პარტიამ, ადმინისტრაციული რესურსის გამოყენებით და ტელევიზიებზე წვდომით, მოახერხა საზოგადოების დარწმუნება, რომ „ნაციონალების“ მობრუნების საფრთხე არსებობს, - ამის შესახებ "რესპუბლიკური პარტიის" ერთ-ერთმა ლიდერმა ლევან ბერძენიშვილმა "ექსპრესნიუსთან" ინტერვიუში განაცხადა.

რატომ დამარცხდა "რესპუბლიკური პარტია", რამ განაპირობა "პატრიოტთა ალიანსის" პარლამენტში მოხვედრა, არიან თუ არა პრორუსული ძალები მმართველ გუნდში და ემუქრება თუ არა პროდასავლურ კურსს საფრთხე - ეს იმ საკითხების არასრული ჩამონათვალია, რომელთან დაკავშირებითაც "ექსპრესნიუსი" "რესპუბლიკური პარტიის" ერთ-ერთ ლიდერს ლევან ბერძენიშვილს ესაუბრა. 

ბატონო ლევან,  თქვენმა  პარტიამ ამომრჩეველთა ხმების მხოლოდ 1.55% მოაგროვა. „რესპუბლიკელებმა“  თქვით, რომ არჩევნები შედგა და დამარცხება აღიარეთ. სამაგიეროდ, ბარიერი გადალახა „პატიოტთა ალიანსმა“, რომელიც პოლიტიკურ ასპარეზზე არც თუ ისე დიდი ხანია მოღვაწეობს. როგორ ფიქრობთ, რატომ ვერ მოიპოვეთ ხალხის მხარდაჭერა?

- ის, რომ "რესპუბლიკურმა პარტიამ" ბარიერი ვერ გადალახა, რა თქმა უნდა ჩვენი პრობლემაა. თუმცა, პროდასავლური პარტიების მთელი სპექტრი, გარდა ყოფილი და მოქმედი სამთავრობო პარტიებისა, პარლამენტში ვერ მოხვდა. ის პატარა წარმატება, რომელიც აქვს "პატრიოტთა ალიანსს" სხვა პირობებით არის განპირობებული, ის სულ სხვა სეგმენტია, ჩვენ იქ არ ვასპარეზობთ. ეს არის პრორუსული ძალა და კარგია, რომ მცირე წარმომადგენლობით მოხვდა პარლამენტში. ვთვლი, რომ რადგან საზოგადოებაში არსებობენ ასეთი ძალები, უნდა იყოს კიდევაც წარმოდგენილი პარლამენტში, თუმცა ამით მის მიმართ სიმპათია არ იზრდება. ორმა პარტიამ, ადმინისტრაციული რესურსის გამოყენებით და ასევე, იმის გამოყენებით, რომ ჰქონდათ მიწვდომადობა ტელევიზიებზე, მოახერხა საზოგადოების დარწმუნება, რომ არის საფრთხე, „ნაციონალების“ მობრუნების, ამიტომ არ მივცეთ ხმა პატარა პარტიებს. ისე დაიხატა, თითქოს ამ ორი ძალის გარდა არაფერი არ არსებობს. ეს დროებითი მოვლენაა, იმიტომ, რომ საქართველო არ არის კლასიკური ორპარტიული სისტემის ჩამომყალიბებელი ქვეყანა. ეს ევროპული ტიპის ქვეყანაა, რომლის პარლამენტში მრავალი ტიპის პარტია იქნება წარმოდგენილი. სამივე პარტია წინასაარჩევნო პერიოდში ყველაფერს ტყუოდა და ყველას ყველაფერი შერჩა. პარტიების შეცდომა იმხელაა, რამხელა რეიტინგიც აქვთ. როდესაც საზოგადოება დაინახავს, რომ ერთპარტიული სისტემა ძალიან საშიშია, მაშინ შესაძლოა, ერთხელ და სამუდამოდ დარწმუნდეს, რომ არჩევნებში ხმა უფრო დივერსიფიცირებულად უნდა მისცეს. ჩვენ პატივი უნდა ვცეთ ამომრჩევლის ნებას, ეს ბუნებრივია. არ ვთვლი, რომ არჩევნებში რაიმე სერიოზული ტიპის გაყალბება მოხდა, ერთის გარდა; წინასაარჩევნოდ ტვინები იქნა გარეცხილი ისე და არჩევნებში ფული ისე მონაწილეობდა, რომ არჩევნების შედეგებზე გავლენა მოახდინა. ეს არ ნიშნავს, რომ არჩევნები უპატიოსნოდ უნდა ჩაითვალოს, იმიტომ, რომ არც ერთი მოქალაქე არ გეტყვით, ვინ აიღო და არ აიღო ფული. თუმცა ფული, რომ დარიგდა ფაქტები ჩემთვის ცნობილია, მაგრამ მე არ მაქვს არცერთი სასამართლო გადაწყვეტილება, რომელიც ამას ადასტურებს. სტატისტიკურად ცნობილია, ვინ რამდენი მილიონი დახარჯა. ჩემს პარტიას ფული არ ჰქონია. ჩვენ გვქონდა საბაზო დაფინანსება, რომელიც კანონმდებლობით გვეკუთვნის და ის დავხარჯეთ. არც ერთ ბიზნესმენს არც ერთი თეთრი არ შემოუწირავს ჩვენთვის, მაშინ როდესაც შემოწირულობა მრავალ მილიონს აღწევდა მმართველ პარტიებში. ირმა ინაშვილის შედეგი სამარცხვინოა, იმასთან შედარებით, რამდენი მილიონიც დაიხარჯა. ამ ვითარებაში "ქართულ ოცნებას" ექნება საკონსტიტუციო უმრავლესობა 4 წლის განმავლობაში, თუ რა თქმა უნდა თვითონ პარტიას არ მოუვიდა რამე. საზოგადოება უნდა იყოს მობილიზებული, რომ მან შემთხვევით ამხელა ძალაუფლება ბოროტად არ გამოიყენოს. ჩვენ ევროპულ გზაზე კი დავდივართ, მაგრამ მთლად ევროპელები ვერ ვართ. ვინმემ არ მითხრას, რომ სადმე ევროპაში შესაძლებელია "ქართული ოცნების" მაგვარმა, აბსოლუტურად უცნობმა კრებულმა, პარტიას ვერ ვარქმევ, იმიტომ, რომ უმეტესობა პარტიის წევრებიც კი არ არიან, ქვეყანა მართოს. ასეთი რისკი, რომ გაწიეს ეს არის ჩვენი თავზეხელაღებული საზოგადოების ამბავი. ვართ ის საზოგადოება, რომლებსაც ახლა ექნება პრობლემები და ამ პრობლემების გადაწყვეტა მოუწევს.

ექსპერტთა ნაწილის ვარაუდით, „რესპუბლიკელების“ მარცხი განაპირობა იმან, რომ თქვენ  აქცენტს აკეთებდით საგარეო კურსზე და საშინაო პოლიტიკაში გაურკვეველი იყო, რას სთავაზობდით ახალს. საზოგადოებამ კი, ყურადღება მიაქცია პარტიას, რომელსაც პატრიოტიზმი წინა პლანზე აქვს წამოწეული. იზიარებთ ამ მოსაზრებას?

- ერთ-ერთმა ექსპერტმა შეადარა საპრეზიდენტო არჩევნები საპარლამენტოს და არაადეკვატური არგუმენტები დაგვისახელა. ასეთი ექსპერტების მე არ მჯერა. ჩვენი დევიზები იყო, "წყალი ყველა ოჯახს", "მეტი ქალი პოლიტიკაში", "ევროპელი პარტნიორი ყველა ქართველ ბიზნესმენს". ინაშვილი და ჩვენ სხვადასხვა ამომრჩეველზე ვმუშაობთ, ინაშვილის ამომრჩევლები ჩვენ ხმას არ გვაძლევენ. ზოგს შესაძლოა სიტყვა "პატრიოტი" ალიანსის შემთხვევაში აბნევს, მაგრამ ეს პრორუსული ძალაა და ჩვენ სწორედ მას ვუპირისპირდებოდით ჩვენი პროდასავლური ორიენტაციით. ორივე დიდი პარტია, რომელიც მოხვდა პარლამენტში, ოფიციალურად პროდასავლურია. რაც შეეხება ქალბატონი ირმას პარტიას, ზუსტად 5%-ის მახლობად, რომ იყო, კაციშვილმა არ იცის, რომ არ გაუქმებულიყო ოქმები და უბნები, მოხვდებოდა თუ არა პარლამენტში. არსებული ხელისუფლების ინტერესში იყო, მათი პარლამენტში მოხვედრა, რათა შემთხვევით ისე არ მომხდარიყო, რომ "ნაც.მოძრაობას" უარი ეთქვა პარლამენტში შესვლაზე და მარტო ერთი პარტია არ დაეტოვებინათ, რაც ძალიან სამარცხვინო იქნებოდა მთელი მსოფლიოს თვალში. ბევრისთვის ეს არჩევნები ტრაგედიაა, იმიტომ რომ "ნაციონალურმა მოძრაობამ" მიიღო 27 ადგილი. ვფიქრობ, რომ 27 ადგილი "ნაციონალური მოძრაობისთვის" შეიძლება ძალიან ბევრია, 10 ჯობდა, ოღონდ ყოფილიყო წარმოდგენილი სხვა პარტიები. "რესპუბლიკელებიც" რომ მოვიდნენ ასეთი უმრავლესობით, ისინიც დაარღვევენ რაღაცას, იმიტომ, რომ უკონტროლო ხდება ყველა ვისაც ამოდენა ძალაუფლება აქვს. ძალაუფლება რყვნის, ხოლო აბსოლუტური ძალაუფლება რყვნის აბსოლუტურად, ამაშია საფრთხე. ისინი ამბობენ, რომ საფრთხე არ არის. აქ ვართ, ვიცხოვრებთ ეს 4 წელი და ვნახავთ იქნება თუ არა საფრთხე, ვნახავთ რა მოუვა პრეზიდენტის ინსტიტუტს, ვნახავთ, რა მოუვა "რუსთავი 2"-ს. კონსტიტუციაში ჩაწერენ ქალის და კაცის ამბავს, ეს რა დიდი პრობლემაა ასეთი, მაშინ როდესაც სამოქალაქო კოდექსში ისედაც ეწერა. თუ ამისთვის არიან მოსული, რომ ეს ჩაგვიწერონ და არ გააუმჯობესონ ცხოვრების პირობები, მაშინ რა თქმა უნდა ეს ყველაფერი სერიოზულ პრობლემებში გადაიზრდება. ვიცით, რომ ზვიად გამსახურდიას, ედუარდ შევარდნაძეს და მიხეილ სააკაშვილს ჰქონდა საკონსტიტუციო უმრავლესობა, ყველას რაღაც მოუვიდა. ჯერ მოსულები არ არიან და უკვე დაიწყეს იმაზე ლაპარაკი ვის იმპიჩმენტს მოახდენენ და რას შეცლიან. დარწმუნებული ვარ, ისეთ კანონს მიიღებენ, რომლის მიხედვით პრეზიდენტს სასახლიდან გამოიყვანენ.

ბევრს დაწყდა გული, რომ „რესპუბლიკელები“ პარლამენტში ვერ მოხვდით. ამ ფონზე, როგორ ფიქრობთ, რატომ არ იაქტიურა თქვენმა ამომრჩეველმა. თვლით თუ არა, რომ წინასაარჩევნო პერიოდი საკმარისად ვერ გამოიყენეთ?

-  სოციალურ ქსელებში გამოჩნდა, რომ მთელი საქართველო აღელვდა იმაზე, რომ უსუფაშვილი არ არის პარლამენტში. სხვათაშორის იმასაც არ გამოვრიცხავ, რომ ისინიც კი აღელვდნენ, რომლებიც არჩევნებზეც კი არ მისულან. მათ ეგონათ, რომ სხვები მისცემენ ხმას. თუ ეს ვინმეს ასე აღელვებდა, აქამდე იყო დასაფიქრებელი. დიახ, "რესპუბლიკურმა პარტიამ" ვერ შეძლო წინასაარჩევნოდ მუშაობა. პარტიას ფული არ ჰქონდა, უფულოდ არჩევნების მოგება წარმოუდგენილია. ის, რაც ჩვენ ავიღეთ, არის ძალიან თავდადებული 27 ათასის ხმა, რომლებიც მიუხედავად ყველაფრისა აძლევენ ხმას "რესპუბლიკურ პარტიას". ჩვენ ვაჩვენეთ ის შედეგი, რომელსაც აჩვენებენ ნულოვანი დაფინანსების მქონე პარტიები. თუ არ მისცემ ხმას "რესპუბლიკურ პარტიას" უსუფაშვილი პარლამენტში თავისით ვერ მოხვდებოდა. უსუფაშვილმა როგორც მაჟორიტარმა მიიღო 11%, თუმცა ეს არ იყო საკმარისი, რომ მეორე ტურში მონაწილეობა მიეღო, ამიტომ იქ გავიდა სევდია უგრეხელიძე. არ მეგულება არც ერთი ადამიანი, რომელსაც ჰგონია, რომ სევდია როგორც პოლიტიკოსი აჯობებს უსუფაშვილს. რაც შეეხება "ქართულ ოცნებას" მათ გულით და სულით მიაჩნიათ, რომ ლევან გოგიჩაიშვილი უკეთესი კანდიდატია ვიდრე დათო უსუფაშვილი, იმიტომ, რომ დავით უსუფაშვილმა თავისი წესიერებით და პრინციპულობით გააღიზიანა საქართველოს პარლამენტის წევრები "ქართული ოცნებიდან". ეს გამოიხატებოდა იმაში, რომ უსუფაშვილმა პრემიები მოხსნა, დანამატები მოხსნა, ბევრ რამეს აქცევდა ყურადრებას, ანუ ყველას სისხლი გაუშრო წესიერებით. უსუფაშვილისთვის ამოსავალი წერტილი პროცედურული დემოკრატია იყო, მაშინ როდესაც ვიღაცეებს დემოკრატიის სწრაფად მიღება უნდათ. პარლამენტი სადაც მსჯელობდნენ და ლაპარაკობდნენ, შეიცვლება პარლამენტით სადაც კამათი არ იქნება. რა კამათი უნდა იყოს, როდესაც ერთი ძალა იტყვის, ჩვენ ასე გვინდა და ყველა კანონს მიიღებენ. ვიღაცა ვინც მისტირის უსუფაშვილს, ნუ მოთხოვს მას პარტია დატოვოს, რომ პარლამენტის თავმჯდომარე იყოს, მას აქვს თავისი შეხედულებები და იდეოლოგია, ამიტომ ეკუთვნის ამ პარტიას. არჩევნებამდე სოციალურ ქსელებში იყო გამოკითხვა, რომლის მიხედვითაც გაირკვა, რომ მომხმარებლების 80% "რესპუბლიკელია". მაგრამ საქმეში შემოწმებისას აღმოჩნდა, რომ ხმას არ გვაძლევენ. მე პირადად გავიხსენებ უსუფაშვილის იმ სიტყვებს, "ჩემი ნება, რომ იყოს "რესპუბლიკელებს" მივუსჯიდი პარლამენტში ყოფნას". ვიღაცამ ხომ უნდა იმუშაოს პარლამენტში. "რესპუბლიკელების" პარლამენტში არ ყოფნა ნიშნავს, იმას, რომ ვიღაცეები სხვა სტილის მუშაობას შემოგვთავაზებენ საზოგადოებას. რესპუბლიკური პარტიის წინააღმდეგ ძალიან სერიოზული პროპაგანდა იყო როგორც "ნაციონალური მოძრაობიდან" ისე "ქართული ოცნებიდან" და ბიძინა ივანიშვილის გაუთავებელი თავდასხმები, ამის მიუხედავად ასეთი კვალიფიკაციის ხალხი უნდა მოეყვანა ამომრჩეველს პარლამენტში, თუმცა ეს ასე არ მოხდა. ეს პარტია არ გაუქმდება ამის გამო. 2020 წლამდე ბევრი რამ გაირკვევა, მათ შორის ისიც გაირკვევა, კარგია თუ არა ერთპარტიული სისტემა და ააშენებენ თუ არა საბჭოთა კავშირს საქართველოში. საბჭოთა კავშირის აშენებას სჭირდება რესურსები, რომელიც "ქართულ ოცნებას" არ აქვს. აქ საბჭოთა კავშირს ვერავინ ააშენებს, ამიტომ ეს სახუმარო მდგომარეობა საკონსტიტუციო უმრავლესობასთან დაკავშირებით დიდხანს ვერ გასტანს. მათ ექნებათ შიდა პრობლემები, როგორც მოუვიდა მიხეილ სააკაშვილს.

არჩევნების შემდეგ, რუსი დეპუტატები საქართველოს პარლამენტთან საპარლამენტო კავშირების აღდგენაზე ალაპარაკდნენ. ხომ არ არსებობს პროდასავლური კურსის შეცვლის საფრთხე?

- რუსი დეპუტატების აღფრთოვანება, იმ 6 ადგილით, რომელიც მოიპოვა ირმა ინაშვილმა, ცოტა გადაჭარბებული მგონია. 6 კაცი, თან აქ ხარისხზეც არის ლაპარაკი, მაინც და მაინც გავლენას ვერ მოახდენს. რაც შეეხება "ქართულ ოცნებას" მას აქვს დეკლარირებული პროდასავლური კურსი და მათ იმით მიაღწიეს წარმატებას, რომ თქვეს "ჩვენ არ გვჭირდებიან "რესპუბლიკელები" და "თავისუფალი დემოკრატები"" ევროპასთან სალაპარაკოდ. ვიღაცამ ეს დაიჯერა. მათ გაცემული აქვთ პირობა და თუ ისინი ამ კურსს გადაუხვევენ, ეს ძალიან სერიოზული პრობლემა იქნება. არ მგონია, რომ "ოცნება" ამ კურსს გადაუხვევს, მაგრამ მათ რიგებში რომ არიან პრორუსულად განწყობილი ცალკეული პიროვნებები, ამაში ეჭვი არ მეპარება. უბრალოდ სახელებით და გვარებით ვიცი. თუ ვინმეს ჰგონია, რომ საქართველო ამერიკული და ევროპული ფულით რუსეთისკენ გაუხვევს, ვინმეს რამე არ შეეშალოს. რუსეთთან ურთიერთობას ვერ გავაუმჯობესებთ, მანამ სანამ ისინი ოკუპანტები არიან. შეიძლება იყოს მცდელობა, რომ მოიხსნას ვიზები, გაიზარდოს ვაჭრობა, ტურიზმი, მაგრამ დიპლომატიური ურთიერთობა ვერ აღდგება. თუ იმას მოვუსმენთ, რას ამბობს ინაშვილის პარტიის ერთ-ერთი ლიდერი თავისი წარმომავლობის შესახებ, სერიოზულად ამ პარტიის აღქმა მარტო რუს დეპუტატებს შეუძლიათ და ქართველი ამომრჩევლის იმ ნაწილს ვინც ხმა მისცა ერაკლე მეფის, დავით აღმაშენებლის და ალის და მაჰმადის ერთდროულ შთამომავალს, ბატონ თარხან-მოურავს, რომელმაც თავისი კავშირებით გაგვაოცა. ჩვენი ახალგაზრდობა ელოდება ევროინტეგრაციას და ძალიან გვიხარია, რომ ქუთაისიდან მილანში 9 ევროდ შეგვიძლია გავფრინდეთ, ამიტომ არ გვაღელვებს 200 ევროიანი რეისები მოსკოვში.

იყო თუ არა „ნაციონალური მოძრაობისგან“ კოალიციის შექმნის შემოთავაზება?

- არანაირი საუბრები, იმასთან დაკავშირებით, რომ "ნაციონალურ მოძრაობას" ჩვენთან და კიდევ 2 პარტიასტან კოალიციის შექმნა სურდა არ ყოფილა. ამავდროულად, ბარამიძეს საიდანღაც გაუგია, რომ წინააღმდეგი ვიქნებოდით. რაც შეეხება "ეროვნულ ფორუმს" მათ უკვე განაცხადეს, რომ მსგავსი საუბარი არ ჰქონიათ. ეს იყო ერთ-ერთი პარტიის ოცნება, თუ როგორ დაებრუნებინათ უმრავლესობა. ბარამიძეს ეგონა, რომ თუ ჩვენ მოგვიწევდა არჩევანის გაკეთება ივანიშვილსა და მიშასგან გათავისუფლებულ "ნაციონალურ მოძრაობას" შორის, "რესპუბლიკელების" არჩევანი იქნებოდა ბარამიძე. გეტყვით, რომ "რესპუბლიკური" არჩევანი ვერასდროს იქნება ბარამიძე. პარლამენტში გივი თარგამაძის გარდა ყველას ვესალმები. გათვლა, რომ დაახლოებით თანაბარი რაოდენობით იქნებოდნენ "ნაციონალები" და "ქართული ოცნება", მას შემდეგ რაც "ნაციონალებს" ეს რამდენიმე პარტია შეუერთდებოდა, ნიშნავს, რომ პოლიტიკაში ხანგრძლივი არსებობის მიუხედავად მას რეალიზმმა უღალატა. მათ უმრავლესობის შექმნის შანსიც კი არ ჰქონდათ. ჩვენ მათთან ერთად უმრავლესობას არ შევქმნიდით, რომც ყოფილიყო ასეთი შანსი. "ნაცები" გულრწფელად ფიქრობდნენ, რომ ხელისუფლებაში ბრუნდებიან, მიშა ჩამოდის, გვირაბი კეთდება და ა.შ.

რამდენად სწორად მიგაჩნიათ თავისუფალი დემოკრატების ლიდერების მიერ პოლიტიკური საქმიანობის შეჩერება. ელოდებით თუ არა, რომ „დემოკრატების“ ლიდერები ხელისუფლებაში რომელიმე თანამდებობაზე დაინიშნებიან?

- იმედი გვაქვს, რომ მიუხედავად პოლიტიკური მოვლენებისა "თავისუფალი დემოკრატების" პარტია გადარჩება და სხვა ადამიანები შეძლებენ მის აღორძინებას. მხოლოდ იმას ვიტყვი, რომ ჩვენ ასე არ მოვიქცეოდით, მაგრამ ეს იმას არ ნიშნავს, რომ ჩვენ მათ გავაკრიტიკებთ. მათ ამომრჩეველს ვეტყოდი, თუ არ იცით რომელ ლიბერალს უნდა მისცეთ ხმა, კიდევ არის ლიბერალური პარტია საქართველოში, რომელიც ყოველთვის დარჩება პოლიტიკაში. ალასანიას აქვს თავისი ლოგიკა და წასვლა პოლიტიკიდან თავისი პასუხისმგებლობა ჰგონია, ზოგს ეს უპასუხისმგებლობად მიაჩნია. ვიტყვი ერთს, რომ ჩვენ ასეთ ნაბიჯს არ და ვერ გადავდგავთ. ასეთი ნაბიჯები, რომ გადაგვედგა, ჯერ კიდევ 1983 წელს დავიშლებოდით, როცა დაგვაპატიმრეს. პარტიიდან თუნდაც დროებითი გასტროლი, მე არ მესმის. ეჭვი მეპარება, რომ ირაკლი ალასანია ჩვენ ვიხილოთ რომელიმე თანამდებობაზე "ქართულ ოცნებასთან" შეთანხმებით. ვფიქრობ, რომ მას სულ სხვა ბედი აქვს. დანარჩენზე ვერ გეტყვით, გამორიცხული არაფერია.

როგორ ფიქრობთ, რამდენად წარმატებული შესაძლოა იყოს ირაკლი კობახიძე პარლამენტის თავმჯოდმარის პოსტზე და ვის მოიაზრებთ მმართველ გუნდში დავით უსუფაშვილის შემცვლელად?

- ვფიქრობ, რომ "ქართული ოცნების" შემადგენლობაში ახლა არ არის არც ერთი წარმომადგენელი, რომელიც იქნებოდა კარგი თავმჯდომარე. კარგი თავმჯდომარე უსუფაშვილის, ბაქრაძის, თუნდაც ნინო ბურჯანაძის ან ზურაბ ჟვანიას ტოლფარდი, რომ არ ჰყავთ, ეს ნათელია. მათ უნდა აირჩიონ უკეთესი თავისი რიგებიდან. ირაკლი კობახიძეს ჩვენ ვიცნობთ მარტო მისი აგრესიული განცხადებებით სხვა პარტიების მიმართ. პარლამენტის თავმჯდომარე ასეთი უხეში თუ იქნება და ასეთი აგდებული ტონით თუ ილაპარაკებს იქვე მყოფ მოწინააღმდეგეებზე, რა თქმა უნდა ის ვერ შედგება კარგ თავმჯდომარედ. ვთვლი, რომ მეტისმეტად ახალგაზრდაა, რაც იქნება პრობლემა. მიშას დროს მსგავსი გადაწყვეტილებები გვახსოვს, ადამიანები პირდაპირ სტუდენტური სკამიდან, მინისტრები გახდნენ და არცერთმა არ გაამართლა. პარლამენტის თავმჯდომარის ძირითადი ფუნქცია არის მოწინააღმდეგეებთან ლაპარაკი, თორემ შინაურებში ლაპარაკს რა უნდა. უსუფაშვილი იყო ბრწყინვალე იმით, რომ არც "ქართულ ოცნებას" უყვარდა და არცერთ ფრაქციას "რესპუბლიკელების" გარდა, მაგრამ ყველასთან ჰქონდა ურთიერთობა და პარლამენტმა იმუშავა. ველოდებით უხეშ და ზოგ შემთხვევაში უზრდელ მმართველობას, როცა გყავს საკონსტიტუციო უმრავლესობა, ასეთ რამეს ელოდები. თუ ჩემი რჩევა მტრულ რჩევად არ აღიქმება, ცოტა ავტორიტეტული და ასაკოვანი კაცი აირჩიონ, რომ ასაკს მაინც სცეს პატივი ვიღაცამ. უზრდელი თავმჯდომარე ამ ისედაც წამხდარ საქმეს უარესად დააზიანებს. ის, რომ ირაკლი კობახიძე კარგი თავმჯდომარე იქნება ამის შანსი არის 1%. როგორც მე ვიცი, მათ ირაკლი კობახიძეზე ადრე ჰქონდათ მიღებული გადაწყვეტილება, ახლა კი საკითხი ხელახლა გაიხსნა კამათისთვის. თუმცა მე ამ კანდიდატურას არ გამოვრიცხავ. შეიძლება ერთი-ორი გადაწყვეტილება მოასწრონ, მაგრამ მალე დაკარგონ უმრავლესობა. იმისთვის, რომ "ოცნება" იყოს შეკრული, 27 კაციდან უნდა შექმნან საფრთხობელა, რომ "არიქა ყველაფერში დაგვიჯერეთ, თორემ 27 კაცი მოდისო". ქართველი ხალხის ნებისყოფასაც და მოთმინებასაც ექნება საზღვარი. 27 კაცი ქვეყანას, რომ ვერ არევს და რევოლუციას ვერ მოაწყობს, მაგდენს ჩვენი საზოგადოება მიხვდება.

ბატონო ლევან, თუ ირაკლი ღარიბაშვილი პოლიტიკაში დაბრუნდება, როგორ ფიქრობთ, რა სტატუსით შეიძლება ის მოგვევლინოს?

- ვფიქრობ, რომ მომავალი საპრეზიდენტო არჩევნები ისეთი სახის, როგორც ჩვენ წარმოგვიდგენია, არ იქნება. ამ ნაწილში "ოცნების" დაპირება, რომ ისინი შეცვლიან პრეზიდენტის არჩევის წესს, რა თქმა უნდა შევა ძალაში. მათ საამისოდ დრო ექნებათ. ასეთ შემთხვევაში იქნება სრული გარანტია, რომ ისინი აირჩევენ იმას ვინც სურთ. ასეთ პრეზიდენტად შეიძლება აირჩიონ როგორც ირაკლი ღარიბაშვილი თუ ბიძინა ივანიშვილის სურვილი ეს იქნება, ან ბიძინა ივანიშვილიც თუ ეს ისევ მისი სურვილი იქნება. ივანიშვილის პრეზიდენტობა მე ვფიქრობ, რომ არ არის სასარგებლო, რადგან 1 წლის შემდეგ აუცილებლად წავა. მას არ უყვარს ხელისუფლება, ის ბიზნესმენია და თავისი საქმე უფრო აინტერესებს. რაც შეეხება ღარიბაშვილს თუ ის დისკუსში კვლავ შემოიყვანეს, გამოდის რომ მათი თვალსაწიერი ღარიბია. ირაკლი ღარიბაშვილი რაც არის ჩვენ ვიცით, მაგრამ შეიძლება თავზე მოგვახვიონ, იმიტომ, რომ პარლამენტი აირჩევს. თავიდან ივანიშვილს უნდოდა ვანო კიღურაძე პრეზიდენტად, ეგონა, რომ მოხერხებული პრეზიდენტი იქნებოდა და კიდევ კარგი ეს ასე არ მოხდა, რადგან კიღურაძე ძალიან ჯიუტი კაცია და ბევრ პრობლემას შეუქმნიდა. ამასთან, ღარიბაშვილი ნიშნავს უკიდურესად მორჩილ პრეზიდენტს. მათი ძირითადი ამოცანაა, რომ არცერთი სახელისუფლებო შტო არ დარჩეს მათი კონტროლის გარეშე. შესაბამისად, ასეთ კანდიდატს მოძებნიან. ჩემი პირადი სურვილია, რომ ცოტა უფრო პოლიტიკურად სიმპატიური კაცი შეარჩიონ. ღარიბაშვილი გამოვცადეთ და ვნახეთ, რომ მაღალ თანამდებობას არ შეესაბამებოდა. ამაში ყველა დარწმუნედა, უცხოელებიც, შინაურებიც და ივანიშვილიც, ამიტომ უბრალოდ ამოაძრო პოლიტიკიდან საცობივით. ამიტომ, ისევ საცობივით დაუსვას პოლიტიკას ეს კაცი, რაც საზოგადოების მეტისმეტი დაცინვაა. თუ ამაზე მეტი არ შეუძლიათ, ბუნებრივია ასეც იზამენ, მაგრამ ამას არ ველოდები. ყველაფერი არის იმაზე დამოკიდებული, როდის, რა და რომელ საათზე მოუნდება ბიძინა ივანიშვილს. თუმცა ეს დიდხანს არ გაგრძელდება. ვერც ივანიშვილი შეინარჩუნებს ექსკლუზიურ უფლებებს და ვერც ჩვენი ხალხი შეეგუება იმას, რომ პრეზიდენტის არჩევა იმაზე იყოს დამოკიდებული, თუ რამდენი ხანი იმუშავა ადამიანმა "ქართუ"-ს ბანკში.

აუცილებლად უნდა გკითხოთ თქვენს სამომავლო გეგმებთან დაკავშირებით. რას აპირებთ ? ხომ არ ყოფილა მმართველი გუნდიდან რაიმე შემოთავაზება? თუ იქნება დათანხმდებით ?

- ჭორის დონეზე გავიგეთ, რომ ვიღაც გეგმავს დანიშნოს უშიშროების საბჭოს მდივნად უსუფაშვილი, ხიდაშელი, ირაკლი ალასანია, ვიქტორ დოლიძე და სხვა. პრეზიდენტის ადმინისტრაცია ამბობს, რომ მსგავსი ამბები მათგან არ მოდის. უსუფაშვილს და ხიდაშელს ზუსტად ვიცი, რომ ასეთი ტიპის წინადადება არ მიუღია. ივანშვილმა აბსოლუტურად უკადრებელი ტექსტები თქვა, რომლის შემდეგ ადამიანს არ სთავაზობენ სამსახურს. პოლიტიკურად ჩვენი გუნდი "ქართულ ოცნებას" არ ეთანხმება, ასეთ შემთხვევაში როცა ადამიანს არ ეთანხმები, არც თანამდებობაზე დანიშნვას დათანხმდები. ჩვენ პარტიას არ გამოუვიდა ივანიშვილისგან ფორმალური კაცის გაკეთება, მან ეს არ ისურვა და ისურვა არაფორმალური ჩარევები. წარსულში უსუფაშვილს ჰქონდა შემოთავაზება დაეტოვა პარტია და მიეღო ყველაფერი, ახლაც წინასაარჩევნოდ იყო ამის მცდელობა, მაგრამ მან ეს არჩევანი არ გააკეთა. ვფიქრობ, რომ მოგვიწევს რებრენდინგი და წინ წამოვწევთ, არა მხოლოდ ძველ ცნობილ სახეებს, არამედ ახალ სახეებსაც. სულ პირველ რიგებში, ანტიკურ ომშიც ჰომეროსთან, ახალგაზრდები იბრძვიან. ნესტორი სულ პირველ რიგში არ იბრძოდა, ვაპირებ ნესტორის პოზიციაში ყოფნას, ანუ ბოლომდე ბრძოლას, მაგრამ ახალგაზრდების წინ წამოწევას. "რესპუბლიკური პარტია" არის წარსულის მქონე მომავლის პარტია. როგორც ილია ჭავჭავაძე იტყოდა, "აწმყო არ გვწყალობს, თორემ მომავალი ჩვენია". ჩვენ გვყავდა პარლამენტის საუკეთესო თავმჯდომარე. ერთი-ორი კაცი პარტიიდან წავა, ასე ხდება ხოლმე არჩევნების შემდეგ, მაგრამ პირობას გაძლევთ, ესენი არ იქნებიან ადამიანები, რომლებსაც საზოგადოება იცნობს. ეს პარტია იყო, არის და დარჩება იმ პრინციპების ერთგული, რომ ჩვენ ვართ მარათონში, ეს სპრინტი წავაგეთ, მაგრამ უნდა მოვიგოთ შემდეგი. შევეცდებით შეცდომების გამოსწორებას, გავაკეთებთ ანალიზს, თუმცა თუ არც ერთი ბიზნესმენის კაპიკი არ გაგვეკარა, იცოდეთ, რომ ჩვენი ენთუზიაზმი საუკუნის ბოლომდე გასტანს. არსებობს აღმართი და დაღმართი, ერთხელაც ჩვენ ისევ ავალთ აღმართზე, ისევ გვეყოლება პარლამენტის თავმჯდომარე, ისევ გვეყოლებიან კომიტეტის თავმჯდომარეები და ისევ გვეყოლება თავდაცვის მინისტრები, ეს ასეთი პარტიაა.
 

ბელა არუთინოვი

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

საფრანგეთის საგარეო „უცხოური გავლენის გამჭვირვალობის“ კანონპროექტზე - ეს ინიციატივა ევროკავშირის ღირებულებებს ეწინააღმდეგება

სამხარაძე - კანონისთვის რუსულის დარქმევა არის დისკრედიტაციული პოლიტიკური მეტაფორა, რომელიც მიმართულია გამოიწვიოს საზოგადოების აღშფოთება

სამხარაძე BBC-ს ჟურნალისტს - კანონპროექტში არ არის ნახსენები სიტყვა „აგენტი,“ შესაბამისად, რაც ქალბატონმა პრეზიდენტმა თქვენთან ინტერვიუში ახსენა, სრული სიცრუეა

კასპის მუნიციპალიტეტის სკოლამდელი აღზრდის დაწესებულებების აღმზრდელ-პედაგოგებისთვის 2 დღის განმავლობაში ტრენინგი მიმდინარეობდა