ცენტრალური აზიის რეგიონალური ეკონომიკური თანამშრომლობის (CAREC) მე-15 მინისტერიალზე, საქართველო CAREC-ის მე-11 სრულუფლებიანი წევრი გახდა.

ეკონომიკისა და მდგრადი განვითარების სამინისტროს ინფორმაციით, მინისტერიალი 25-26 ოქტომბერს ისლამაბადში (პაკისტანის ისლამური რესპუბლიკა) გაიმართა. მასში მონაწილეობა მიიღეს საქართველოს ეკონომიკის მინისტრის მოადგილემ გენადი არველაძემ და ამავე სამინისტროს ტრანსპორტისა და ლოგისტიკის განვითარების პოლიტიკის დეპარტამენტის უფროსმა ქეთევან სალუქვაძემ.

მინისტერიალზე მოხსენებით გამოსვლისას, გენადი არველაძემ CAREC-ის წევრ ქვეყნებს და აზიის განვითარების ბანკს მხარდაჭერისთვის მადლობა გადაუხადა. მან ვრცლად ისაუბრა საქართველოს მთავრობის მიერ განხორციელებულ და დაგეგმილ ეკონომიკურ რეფორმებზე და ხაზი გაუსვა საქართველოს გაწევრიანების მნიშვნელობას წევრი ქვეყნებისათვის.

გარდა ამისა, საქართველოს ეკონომიკისა და მდგრადი განვითარების მინისტრის მოადგილემ გენადი არველაძემ 26 ოქტომბერს მონაწილეობა მიიღო მინისტრთა დახურულ სხდომაში, რომელზეც CAREC-ის სტრატეგიის განახლების საკითხი განიხილეს.

სხდომაზე გენადი არველაძემ წევრ ქვეყნებს გააცნო საქართველოს მხარის ინიციატივები ტრანსპორტის, ვაჭრობისა და ენერგეტიკის სფეროებში. მან ყურადღება გაამახვილა წევრ ქვეყნებს შორის ეკონომიკური დერეფნების განვითარებაზე, ვაჭრობისა და საბაჟო პროცედურების გამარტივების საკითხებზე. ამასთან, გენადი არველაძემ ისაუბრა CAREC-ის წევრ ქვეყნების მიერ საგზაო უსაფრთხოების განვითარების მიზნით განსახორციელებელ ქმედებებზე და მიესალმა მინისტერიალის ფარგლებში წევრი ქვეყნების მიერ მიღებულ საგზაო უსაფრთხოების სტრატეგიას, რომლის შემუშავებაში ქართული მხარე აქტიურად იყო ჩართული.

2015 წლიდან საქართველო CAREC-ში დამკვირვებლის სტატუსით მონაწილეობდა. CAREC-ის საქმიანობის ძირითად მიმართულებებს წევრ ქვეყნებს შორის ტრანსპორტის, ვაჭრობის, საბაჟოს და ენერგეტიკის სფეროების განვითარება წარმოადგენს. განსაკუთრებული ყურადღება ეთმობა სატრანსპორტო ინფრასტრუქტურის, საბაჟო პროცედურების გამარტივების, სატრანსპორტო და ენერგო დერეფნების განვითარების საკითხებს.

დღეის მდგომარეობით პროგრამაში გაწევრიანებულია შემდეგი 10 ქვეყანა: ავღანეთი, აზერბაიჯანი, ჩინეთი, ყაზახეთი, ყირგიზეთი, მონღოლეთი, პაკისტანი, ტაჯიკეთი, თურქმენეთი და უზბეკეთი.

CAREC-ის ფინანსურ მხარდაჭერას ახორციელებენ აზიის განვითარების ბანკი, ევროპის რეკონსტრუქციის და განვითარების ბანკი, საერთაშორისო სავალუტო ფონდი, ისლამური განვითარების ბანკი, გაეროს განვითარების პროგრამა და მსოფლიო ბანკი.

გაწევრიანების შემდეგ საქართველოს ეძლევა შესაძლებლობა, ისარგებლოს მიმდინარე რეგიონალური მნიშვნელობის ტექნიკური დახმარების და საგრანტო პროექტებით და ასევე ჰქონდეს წვდომა ფინანსებზე რეგიონალური მნიშვნელობის პროექტების დასაფინანსებლად, რომელიც კიდევ უფრო გაზრდის ქვეყნის მნიშვნელობას რეგიონში. CAREC-ის წევრობა ხელს შეუწყობს საქართველოსა და წევრ ქვეყნებს შორის ეკონომიკურ ინტეგრაციას და გააძლიერებს საქართველოს ჩართულობას ისეთ რეგიონალურ და საერთაშორისო პროექტებში და ინიციატივებში,  როგორიცაა მაგალითად ,,ახალი აბრეშუმის გზა“. 

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კალაძე - ყველამ ძალიან კარგად იცის, რომ აფხაზეთი საქართველოა და ამის შეხსენება არავის უნდა სჭირდებოდეს

კალაძე ოპოზიციას - თუ მერიის თანამშრომელს შეუძლია, თქვენს მიტინგზე მივიდეს, რატომ არ შეუძლია ხელისუფლების დაანონსებულ ზეიმზე მოსვლა?

კალაძე არსენალის მთის პროექტზე - 2011 წლიდან კომპანიაში არ ვარ, არანაირი შეხება და ინტერესი არ მაქვს

კალაძე - არავინ ეწევა ისეთ დისკრედიტაციას ევროკავშირის, როგორც კონკრეტული ევროპარლამენტარები