საია-ს მედიის სამართლებრივი დაცვის ცენტრის შეფასებით, “მე-9 არხის” ჟურნალისტზე განხორციელებული ზეწოლის ფაქტი სისხლის სამართლის კოდექსით გათვალისწინებულ დანაშაულის ნიშნებს შეიცავს”.
საია-ს მედიის სამართლებრივი დაცვის ცენტრი ტელეკომპანია “მეცხრე არხის” ჟურნალისტის ნოდარ ჩაჩუას მიმართ განხორციელებული ზეწოლის ფაქტს ეხმიანება.
“ჟურნალისტი აცხადებს, რომ მას სამი უცნობი პირი აშანტაჟებდა და ინფორმაციის მიწოდებას აიძულებდა, ხოლო ამის სანაცვლოდ ფინანსურ ანაზღაურებას სთავაზობდა. ნოდარ ჩაჩუას თქმით, უცნობი პირები მას სთხოვდნენ ინფორმაციას ტელევიზიაში არსებულ სიტუაციაზე. ასევე “მეცხრე არხის” თანამშრომელ მამაკაცთან სქესობრივი კავშირის დამყარებას აიძულებდნენ. მისივე განმარტებით, აღნიშნულმა პირებმა მას თავი გააცნეს რაღაც “სამსახურის” წარმომადგენლებად, რომლებიც “ადამიანებს უგვარებენ პრობლემებს, მაგრამ ამასთანავე, ძალიან დიდ პრობლემებს უქმნიან”. აღსანიშნავია, რომ ჟურნალისტმა მოახერხა უცნობი პირების რამდენიმე მაიდენტიფიცირებელი ნიშნის მითითება. კერძოდ, ცნობილია ტელეფონის ნომერი, საიდანაც მას ურეკავდნენ და იმ ავტომობილის სერია და სახელმწიფო ნომერი, რომლითაც ეს პირები გადაადგილდებოდნენ”, – ნათქვამია საია-ს მიერ გავრცელებულ განცხადებაში.
საია-ს მედიის სამართლებრივი დაცვის ცენტრს მიაჩნია, რომ აღნიშნული შემთხვევა სისხლის სამართლის კოდექსით გათვალისწინებული დანაშაულის ნიშნებს შეიცავს.
“შესაბამისად, საჭიროა, ფაქტზე დროული და მყისიერი რეაგირება მოხდეს, რათა უზრუნველყოფილი იყოს მედიის წარმომადგენლების პირადი უსაფრთხოება და მსგავსი ფაქტების პრევენცია. მნიშვნელოვანია, რომ ეს არ არის ჟურნალისტებზე ზეწოლის და პროფესიულ საქმიანობაში ხელშეშლის პირველი შემთხვევა. საია კიდევ ერთხელ მიმართავს სამართალდამცავ ორგანოებს, მოახდინონ ოპერატიული და ადეკვატური რეაგირება, დროულად გამოიძიონ ჟურნალისტებზე ზეწოლის ფაქტები და უზრუნველყონ იმ პირების დასჯა, ვისი დანაშაულებრივი ქმედებებიც გამოძიების შედეგად გამოიკვეთება”, – ნათქვამია განცხადებაში.
