პრეზიდენტი მიიჩნევს, რომ არსებული, არაორდინარული ვითარება, აუდიტის სამსახურის ეფექტურ მუშაობას საფრთხეს უქმნის

2017-05-23 14:56:29, 2210 ნახვა

სამართალი საზოგადოება

პრეზიდენტის აზრით, არსებული, საკმაოდ არაორდინარული ვითარება, საფრთხეს უქმნის აუდიტის სამსახურის ეფექტურ მუშაობას და ზოგადად კონსტიტუციური ორგანოების ფუნქციონირებას, - ამის შესახებ პრეზიდენტის პრეს-სპიკერმა ეკა მიშველაძემ დღეს გამართულ ბრიფინგზე განაცხადა.

გიორგი მარგველაშვილის შეფასებით, დღეს არსებული ინფორმაციის საფუძველზე შეიძლება ითქვას, რომ ინციდენტი კრიმინალურ შემთხვევას ცდება და პოლიტიკური ელფერი შეიძინა.

"შესაბამისად, საქართველოს პარლამენტმა, როგორც მაკონტროლებელმა ორგანომ, განსაკუთრებული ყურადღება უნდა გამოიჩინოს საგამოძიებო პროცესის მიმართ. ამ გამოძიებას აქვს არა მხოლოდ სამართლებრივი, არამედ პოლიტიკური მნიშვნელობაც, ვინაიდან კიდევ ერთხელ ხაზგასმით აღვნიშნავთ, რომ საქმე სახელმწიფო უწყებების ეფექტურ ფუნქციონირებას ეხება. პრეზიდენტი, როგორც ქვეყანაში სახელმწიფო ორგანოთა ეფექტურად ფუნქციონირების გარანტი, ყურადღებით აკვირდება პროცესებს და მომავალშიც მიადევნებს თვალს მოვლენათა განვითარება", - აღნიშნა მიშველაძემ.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან